Árið 2009

2009

Tvö ný barnabörn

Brynhildur Bjartey með mömmu 8. ágúst á skírnardaginn sinn.

Árið byrjaði með fæðingu Brynhildar Bjarteyjar dóttur Aðalheiðar og Badda. Hún fæddist 1. janúar og var skírð 8. ágúst. Inga og Hreiðar eignuðust svo annað barnabarn okkar á árinu sem fæddist 11. nóvember. Hún var skírð þann 29. nóvember og heitir hún Edda. Þá eru barnabörnin orðin 8 og ekki von á fleirum í bráð (svo vitað sé).

Hilmir er stoltur með litlu langþráðu systur sína (sem að vísu átti að verða bróðir).

Afi “langi” látinn (1913-2009)

Afi fékk pláss á Grund um miðjan janúar en mjög er dregið af honum og hann treysti sér sjaldan að koma í fjölskylduveislur eftir að hann fluttist þangað. Þegar hann var spurður að því hvernig honum liði sagði hann gjarnan “mér líður eins og ég á skilið”. Hann dó svo 15. sept og er okkur öllum í fjölskyldunni harmdauði. Sjálfur var hann farinn að bíða og hafði sagt við hjúkrunarkonuna “Hvað þarf maður eiginlega að verða gamall til að fá að deyja hér?” Hann var svo jarðsuginn í kyrrþey og ekki var fenginn prestur til að tala við kistuna. Það var að hans ósk. Jarðarförin var svo ekki fyrr en 5 október þar sem beðið var eftir að Steinunn, Finnur og Anna Sólrún kæmu að utan. Eyrún fór með minningar­orð og spilað var á orgel og fiðlu og lesin ljóð – þetta var falleg og vel viðeigandi athöfn.

Störf barna minna og tengdabarna

Eyrún var gerð að starfsmannastjóra ASÍ í janúar og Vignir að deildarstjóra hjá Actavis í október. Ragnheiður vann með skólanum í Body-Shop. Inga fékk vinnu hjá Rannsóknarnefnd Alþingis 6. janúar. En fór svo í barneignafrí í byrjun nóvember. Hreiðar hefur nóg að gera í lausamennsku við kvikmyndatöku fyrir RUV og Skjánum. Finnur vinnur áfram hjá Google og Hrefna lauk doktorsnámi sínu við Stanford University. Baddi vinnur enn hjá VBS og Aðalheiður hjá auglýsingastofunni Nonni og Manni. Steinunn útskrifaðist í vor með BA-próf í sálfræði en við vorum fjarri góðu gamni og flogin til Barcelona. Hún hélt úrskriftarveislu sem við því miður, misstum af. Í sumar vann hún svo á Þjónustu- miðstöð Laugardals og Háaleitis. Þar hefur hún unnið á sumrin frá 2006 en seinasta vetur vann hún þar líka með skólanum. Í ágúst fór hún til Árósa í framhaldsnám en kom sem betur fer heim í jólafrí. Einar er áfram í námi í HR í rekstrarverkfræði og stefnir á að ljúka næsta vor. Hann hefur unnið með hjá Orkustofnun.

.

Einar fylgdi Steinunni út og var í Árósum í eina viku.

------------------------------------------

Þorrablót hjá Kristínu Mjöll í janúar.

20. maí fór saumó í Brekkukot – engar myndir finnast frá þeirri för.

Saumaklúbbar hafa verið haldnir reglulega allt árið og hlakka ég alltaf mjög til þeirra. Ég á svo að halda næsta saumaklúbb í janúar. Þessi saumklúbbur hefur haldið hópinn í rúm 40 ár og geri aðrir saumaklúbbar betur!

Z-göngur

Enn stunda ég reglulega göngu (einu sinni í mánuði) með Stín-Stínu, Hildigunni og Siggu. Þetta er Z-gangan en við vorum sessunautar í 4. 5.og 6. Z í Menntó. Þær eru eins og fjallageitur og ég hef varla við þeim þó yngst sé.

Stín-Stín Hildigunnur og Sigga

Sumarbústaður Túnfótur í Ljósavatnshreppi.

Við vorum með Tómasi og Jonnu í sumarbústað í Ljósavatnshreppi 3. júli – 9. júlí

Kvöldmatur úti undir beru lofti.

Á Húsavík

Byggðasafn á Mánárbakka

Þetta er bústaður á vegum Kennarasambands Íslands. Þessa viku fórum við víða um nágrennið s.s. Akureyri, Húsavík, Ásbyrgi, Mývatn, Mánárbakka, Bárðardal, Aldeyjarfoss og skoðuðum altaristöflu í Þorgeirskirkju og Laxárvirkjun. Margrét Þór og synir heiðruðu okkur með nærveru sinni í einn sólarhring. Veðrið var frábært allan tímann.

----------------------------------

Jóhönnur í sumó hjá Heddý 14. júlí

Stín-Stín - Addý – Heddý - Steinunn. Á myndina vantar – Valgý - Birnu – Jóhönnu og Önnu.

Við höfum einnig borðað á veitingahúsum og svo var okkur boðið í hádegissúpu hjá Valgý 31. október. Við fórum þá líka í grenndarkönnun og skoðuðum Áskirkju og skoðuðum húsin við Vesturbrún og Laugarásveg. Steinunn var svo með snyrtivörukynningu að gönguferðinni lokinni.

Kirkjuglugginn er verk Valgerðar Bergsdóttur skólasystur okkar til margra ára.

---------------------------------

Finnur og fjölskylda komu í 5-6 vikna í heimsókn. Við vorum þeirrar ánægju aðnjótandi að hafa þau hér í Byggðarenda þann tíma. Þegar Finnur kemur til landsins er það til siðs að bjóða upp á pörusteik fyrir fjölskylduna.

Finnur sker steikina.

Vignir og Eyrún

Finnur afmæli 35 ára

Finnur hélt þessa fínu veislu í Byggðarenda.

4 ættliðir. Hrefna langamma, Ásdís amma, Hrefna mamma og börnin Bjarki og Anna

Hér er afi í næst seinustu heimsókn í Byggðarendann. Það var í afmælis­veislu Finns 35 ára 29. júlí. Seinasta heimsókn hans var svo þegar Brynhildur Bjartey var skírð þann 8. ágúst.

Fjölskylduferð í Brekkukot í júlí 2009

Við Þórarinn og öll börn okkar, tengdabörn og barnabörn. Aðeins vantar Hreiðar, sem var að vinna og Eddu í maga Ingu.

Gömlu hjónin Anna og Þórarinn + 5 börn – 4 tengdabörn mætt – 7 barnabörn

Hrefna – Anna Sólrún – Finnur – Bjarki Freyr

Trivial Persuit spilað fram á nótt.

Verslunarmannahelgin 2009 – frábært veður.

Anna - Inga - Þór - Guðni - Ólöf

Um verslunarmannahelgina voru fjölskylda Tómasar, við Þórarinn með Önnu Sólrúnu, Inga ogHilmir og Badda fjölskylda í sumarbústöðunum báðum.

Arnhildur með pabba – verslunarmannahelgi.

-------------------------------------------------------------

Í Hruna í lok ágúst.

Það var mér sönn ánægja þegar fimm-mínurnar vildu leggja land undir fót og koma og spila hjá okkur hjónum í Hruna. Þórarinn sá um að við grenntumst ekki í þessari ferð. Veðrið var hryssingslegt og við hættum við ýmsa útivist sem við höfðum áformað en engu að síður fórum við að pakkhúsinu og gerðum góð innkaup. Á heimleiðinni komum við við í Rauðfeldargjá og að Hellnum þar sem við fengum fiskisúpu Fjöruhússins.

Í Fjöruhúsinu.

---------------------------------

Skólaheimsókn Önnu Sólrúnar

Finnur og Anna Sólrún komu til Íslands í október til að vera viðstödd jarðarför afa Eymundar. Anna Sólrún kom í heimsókn í Hofsstaðaskóla - ömmuskóla. Hún stóð sig vel og var allan skóladaginn í 1. bekk GG (kennari Gunnhildur Gísladóttir)

Nýr sumarbústaður Tomma og Jonnu

Í nóvember festu Tómas og Jonna kaup á nýjum sumarbústað og við keyptum þau út. Nýi sumarbústaðurinn er í landi Tjarnar við Syðri Reyki og er hann í beinni sjónlínu frá okkur. Við söknum að sjálfsögðu félagsskaparins en þar sem fjölskyldurnar eru orðnar svo fjölmennar var þörf á útrás.

Fimm-mínur spila í Byggðarenda

Fimm-mínur í spilavítinu. Á árinu telst mér til að spilað hafi verið 18 sinnum nú í desember. Ekki hirði ég um að taka fram hver á metið og verið oftast stjarna kvöldsins og heldur ekki hver hefur oftast verið fýlupúkinn!! Þessi kvöld eru okkur nauðsynleg upplyfting í dagsins önn og vonandi á spilaklúbburinn að vera við lýði í mörg ár enn.

Kalla og Bobba

Kalla vinkona mín kom þrisvar sinnum til Íslands á árinu. Hún kom í maí og aftur í ágúst þegar móðir hennar var jörðuð og svo kom hún seinast í nóvember og þá kom dóttir hennar Blómhvít, kölluð Bobba, með henni. Þær komu báðar í kvöldmat. Við buðum upp á fisk en Bobba borðaði bara meðlætið þar sem hún er grænmetisæta.

Varmárgellur

Varmárgellur halda hópinn og hittust nokkrum sinnum á árinu og fóru í sína árlegu aðventugöngu niður Skólavörðustíginn. Ekki vorum við heppnar með veður því að eiginlega var ekki hundi út sigandi. Við enduðum gönguna á Sólon á horni Ingólfs­strætis og Bankastræti og þar var borðaður girnilegur matur

Les-píur

Brynja býður upp á góða súpu.

Sólrún og Kristrún

Les-píur hittust nokkrum sinnum og ræddu þær bækur sem ákveðið hafði verið að lesa hverju sinn. Hjá Brynju var horft á videomynd af Fridu Kahlo og ætluðum við í leikhús að sjá leikritið Frida.. viva la vida. Ekki varð þó af því. Við erum staðráðnar í að láta þessa fundi ekki niður falla.

Kaupmannahöfn – París – Barcelona – Budapest

14. febrúar vetrarfrí í Hofsstaðaskóla og við flugum til Kaupmannahafnar og bjuggum á Hótel Astoria. Þar voru líka Anna Margrét og Guðni. Anna Margrét sýndi okkur Jernbanekroen þar sem leikin var lifandi músik, kráargestir sungu og andrúmsloftið var eins og á ekta bjórkrá – meira að segja loftið reykmettað og gestirnir sýnilega fastir kúnnar.

Guðni og Anna Margrét

Fyrsta maí fórum við Þórarinn til Parísar og vorum 3 nætur á Hótel Plaza Republique. Á torginu fyrir framan gluggann okkar var “búsáhaldabylting” engu síðri en á Austurvelli jafnt á nóttu sem degi. Ekki var ég alveg með á nótunum með þetta tilstand en skildi þó að tamil tígrar áttu hlut að máli !! Sem betur fer var góð hljóðeinangrun þannig að þetta truflaði ekki nætursvefn okkar. Þarna lifðum við í leti og vellystingum praktuglega, gengum á Signubökkum, heilsuðum upp á Monu Lisu, fórum á kaffihús og borðuðum á kvöldin á góðum veitingastöðum, ítölskum eða frönskum.

Í sumarfríinu flugum við til Barcelona og leigðum við okkur hús í Kateloníu á Spáni. Þar vorum við með íbúð í húsi uppi í fjöllunum. Þar höfðum við hund að heimilisvini og nokkrar hænur Það voru 4 íbúðir í húsinu sem voru leigðar ferðamönnum og sundlaug var á lóðinni. Hitinn þessa viku var vel þolanlegur.

Fjórða utanlandsferð okkar var til Búdapest –22.okt. - 26. okt Með Heimsferðum. Boðið var upp á útsýnisferð um borgina með hópnum en að öðru leyti vorum við á eigin vegum.

Þarna erum við niðri við Dóná (svo blá)

Fiskiréttarboð hjá Kristínu Mjöll í tilefni heimsóknar Gulla

Gulli og Kristín Mjöll

Anna Sólrún er farin að missa tennur enda byrjuð í skóla

Aðventan

Á aðventunni hefur að venju verið mikið að gera. Við fimm-mínurnar höfðum jólaspilastund hjá Jóninnu og gáfum hver annarri gjafir – allar heppnar með jólagjafirnar sínar eins og ónefnt barn sagði einu sinni!! Við Þórarinn fórum í jólamat bæði í Hofsstaðaskóla og í Kvikmyndasafn. Einnig fórum við á tónleika Karlakórs Reykjavíkur í Hallgrímskirkju þar sem Guðni Tómasson er einn kórfélaga.

---------------------

Við mæðgur Eyrún og Inga föndruðum jólakort tvö kvöld og við Inga bökuðum vanilluhringi og piparkökur með aðstoð Margrétar og Hilmis. Líka bökuðum við kleinur en þá var Margrét því miður fjarri góðu gamni.

Skatan hjá Björk og Brandi á Þorláksmessu er ómissandi og pabbi fylgist sjálfsagt með okkur af himnum og glottir þegar við lyftum brennivínsstaupi.

Jól og áramót

Jólakveðja frá Kaliforníu

Á aðfangadagskvöld borðum við hamborgarahrygg og hnetusteik var líka á borðum. Þökk sé Önnu Margréti sem bjargaði hnetusteikinni með því að kaupa fyrir okkur ómissandi kastaníu- mauk í London þar sem hún er ófáanleg á Íslandi þetta árið. Einar sá um forréttinn sem var djúpsteiktur camenbert með rifsberjahlaupi.

Hjá okkur var Ingu fjölskylda og Steinunn og Einar.

Eftirréttur var "ris alamande" og nú fékk Einar möndluna (af því að Finnur var fjarri góðu gamni)

Eftir matinn voru jólapakkarnir gefnir og Hilmir las á merkimiðana.

Á jóladag héldum við þeim sið að borða saman í Byggðarenda, öll fjölskyldan (nema fjölskylda Finns í Kaliforníu – samtals 16 þetta árið).

Spilað var eftir matinn og verðlaunabikar afhentur .

Edda ákvað að fá sér kríublund þar sem hún var orðin þreytt á spilamennskunni!

Þórarinn afhenti farandbikarinn að loknum leik.

Á eftir spilamennskunni voru teknar fjölskyldumyndir af þeim fjölskyldum sem höfðu fjölgað sér á árinu !

Síðasta Z- ganga í ár, gengið var í Fossvogsdal, 29. desember.

Hildigunnur, Stín-Stín og Sigga.

Áramótin 2009-2010

Áramótunum fögnuðum við á Fögruhæð hjá Tómasi og Jonnu – húsið þeirra rúmar okkur ennþá.

Í boðinu voru 21 manns. Þar ber fyrst að telja húsráðendur Tómas og Jonnu. Herdís, Halli og synir þeirra Halldór og Hreiðar Ingi. Guðni og Ólöf og sonur þeirra Tómas Oddur. Eyrún og Vignir með dæturnar Ragnheiði og Margréti. Inga og Hreiðar með Hilmi og Eddu ( 7 vikna). Baddi kom með Arnhildi smá stund en mægurnar voru á meðan í Hafnarfirði. Þarna voru líka Óli Ársæls og Sirrý vinir Tómasar og Jonnu til margra ára.

Ólöf, Tómas Oddur og Þórarinn.

Hreiðar Þór, Inga Sigrún og Edda

Leikjastjórnendurnir í mannanafnaleik - Vignir og Eyrún

Edda átti marga aðdáendur.

Arnhildur Lilja leikur sér í garðhúsinu

Glæsilegar veitingar

Halldór, Hilmir og Margrét kanna birgðirnar

Hreiðar Ingi og Hilmir með hlífðargleraugu

Guðni og Ólöf

Systurnar Ragnheiður og Margrét

Halli og Herdís

Óli og Sirrý

Bræðurnir með spúsur sínar

Nú árið er liðið í aldanna skaut

og aldrei það kemur til baka,

nú gengin er sérhver þess gleði og þraut,

það gjörvallt er runnið á eilífðar braut,

en minning þess víst skal þó vaka.

-----------------

Eyjólfsboðið verður haldið hér í Byggðarenda. Á meðan Eyjólfur fóstri Þórarins lifði bauð hann okkur seinustu árin sín út að borða á veitingastað. Fjölskylda hans hefur haldið þeim sið að hittast í heimahúsi í kringum jól eða áramót. Sunnudaginn 3. janúar 2010 er áætlað að koma saman í Byggðarenda.

Skyldi næsta ár verða svona viðburðarríkt?

Þetta verður seinasti vetur minn í kennslu og ég kemst í klúbb fyrrverandi kennara Varmárskóla. Í viku í júní fer ég með starfsfólki Hofsstaðaskóla í til Alicante og Þórarinn kemur að loknum heimsóknum og við verðum þar í húsi sem við tókum á leigu í eina viku. Önnur áform eru ekki ljós en við vonumst eftir góðu veðri og heilsu allra vina og fjölskyldumeðlima á næsta ári.

Gleðilegt nýtt ár 2010!

Öskudagur 2009

Þarna skrifaði ég á kinnina "Burt með Davíð" að beiðni nemandans.
Dansað í Salnum

Á skurðstofunni

Kasper, Jesper og Jónatan

Unnur kom aðeins og málaði með mér.

Bleika augað

Tvær dísir

Sædís köttur með kettlinginn

Öskupokar saumaðir

Telflt með snuð í munni

Þrír stórhættulegir

Batman og kanínurnar

Sérlákur og ferðamaður á leið til sólarlanda

Nornin Arnheiður

Skvísur úr 5. bekk

Á öskudag var líf og fjör í Hofsstaðaskóla. Þá voru dísir, nornir, beinagrindur, ræningjarnir í Kardemommubænum og margir fleiri á sveimi um skólann. Nemendur áttu kost á ýmsu, m.a. tefla, spila, skoða bækur, leika í tölvu, dansa á Sal, sauma öskupoka og margt fleira. Mitt hlutverk var andlitsmálun og málaði ég marga skurði, blóðslettur, kóngulóarvefi, hauskúpur, blóm, hjörtu og fiðrildi.

Kaupmannahöfn febrúar 2009

Laugardagur 14. febrúar.

Vöknuðum klukkan 4 og gerðum okkur klár. Vorum fyrst á völlinn ekkert opnaði þar fyrr en klukkan 6:30 að mig minnir. Vorum í símasambandi við Önnu Margréti og Guðna en hittum þau ekki þar sem Heiðar snyrtir hélt Önnu á snakki. Við flugum með Iceland Express en þau hálftíma síðar með Icelandair. Á Kastrup flugvelli fengum við okkur almindenlige pølser og øl áður en við fórum í lestina inn á Hovedbanegård. Flækingur abbaðist upp á okkur og fleira fólk á flugvellinum og var fjarlægður af politiet.

Við bjuggum á Hotel Astoria og líka A&G

A &G bönkuðu upp hjá okkur þegar þau komu og við fórum út að ganga. Á Strikinu kom flest kunnuglega fyrir sjónir. Við Anna fórum í Søstrene Grenes og Anna keypti gjafir fyrir barnabörnin en ég var ekki komin í innkaupastuð. Karlarnir leituðu að Long John Silver sem þeir ekki fundu en enduðu á “Hvíta lambinu” sem er uppi á Kultorvet og við hittum þá þar.

Við fórum síðan heim á hótel og fengum okkur fordrykk áður en við mættum á Peder Oxe klukkan 7. http://www.pederoxe.dk/

Ég fékk mér “hamborgara” svona aðeins til að hneyksla hina! En fyrst var salatbarinn, sem aldrei svíkur. Írska kaffið var útbúið fyrir framan okkur og hefðbundið svart rör að dönskum sið. Eftir matinn héldum við heim sæl og södd í leigubíl.

Sunnudagur 15. febrúar.

Við Þórarinn fórum á orgeltónleikar í Kastelkirken. http://da.wikipedia.org/wiki/Kastelskirken

Þar spilaði Lasse Ewerlöf verk eftir F.Couperin, Carl Ph.E. Bach og Cèsar Frank. Að vísu komum við of seint þangað þar sem fórum fyrst í vitlausa kirkju. Ensku kirkjuna, en tvær eldri konur lögðu mikið upp úr að finna fyrir okkur upplýsingar á íslensku um kirkjuna og við skoðuðum hana fyrst. Á heimleiðinni gengum við eftir Bredgade og sáum í búðarglugga forngripaverslunar 3 Strata- hnífa með svörtu skafti frá Georg Jensen einmitt eins og okkur vantaði einn af. Búðin var lokuð en við ákváðum að koma þar við síðar. Þetta kvöld borðuðum við góðan ítalskan mat á Restaurant Frascati á Vesterbrogade 9A. Anna leiddi okkur svo að krá nokkurri Jernbanecafeen. http://www.jernbanecafeen.dk/ Það var svona gamaldags krá þar sem mikið var reykt spilað á harmóniku og hljómborð og gestirnir komu hver af öðrum upp og sungu með. Dömurnar á barnum pössuðu alveg inn í staðinn og litu út fyrir að hafa verið búnar að vera þarna í 40 ár. Hægt að skoða þær nánar á heima­síðunni. Það var þarna eins og að detta tugi ára aftur í tímann og gestirnir voru sælir og glaðir.

Mánudagur 16. febrúar

Eftir sameiginlegan morgunmat fluttum við Þórarinn okkur í kennaraíbúðina í Flensborggade 39

Íbúð kennara­sam­bands­ins var nýuppgerð og rúmgóð og snyrtileg. Við komum okkur fyrir og fórum svo og keyptum vatn og vistir í Nettó. Helge sótti okkur klukkan 3 og fór með okkur á fornsölur í Ravnsborggade. Ég hafði á orði að sumar þeirra væru verri en bílskúrinn okkar og er þá mikið sagt. Á eftir fór hann með okkur á sérkennilega krá. Þar voru bruggkútarnir í öðrum helmingi staðarins og nýtískuleg borð og stólar í hinum helmingnum. Allt mjög snyrtilegt.

Að vanda var vel tekið á móti okkur hjá Helle og Helge og áttum við þar ánægjulega kvöldstund.

Eftir fordrykk fengum við rækjukokteil, pottrétt í sósu og heita eplaköku í eftirrétt. Kaffi súkkulaði og líkjör á eftir í efri stofunni þar sem eldurinn logaði glatt í arninum. Þau eru að bíða eftir því að fá að vita hvort Julía komist inn í kvikmynda­skól­ann og bíða spennt eftir svari. Þegar klukkan var farin að ganga 12 pöntuðum við okkur leigubíl heim.

Þriðjudagur 17. febrúar

Við gengum út á Hovedbanegaarden og tókum þar vagn sem fór upp á Kongens Nytorv. Á miðri leið bilaði vagninn sem við vorum í en enginn kippti sér upp við það og fólk fór á næstu stöð og beið eftir vagni. Okkar vagn stoppaði við Oddfellow-húsið á móti Hótel Phoenix Við vissum ekki hvort við ættum að fara upp eða niður Bredgade en tókum sjensinn og fórum í átt að Kongens Nytorv. Þar vorum við heppin, þegar við komum að búðinni stóð afgreiðslukonan þar með lykilinn og var að loka. Hún sneri þó við og hleypti okkur inn í búðina og sagði hnífinn kosta 50 krónur en við gætum fengið þá alla fyrir 100 krónur. Við slógum til og komum heim með 3 hnífa og eigum þá 2 til vara!!

Síðan lá leið okkar á Hviids vinstue. http://www.hviidsvinstue.dk/

Þar er allt miklu snyrtilegra en áður en ég áttaði mig ekki á hvað það var fyrr en Þórarinn sagði að nú mætti ekki reykja þarna. Á Strikinu mættum við þessum myndalega manni.

Þá var farið á veitingarstaðinn Madklubben Store Kongensgade 66.
Þar fengum við fyrst dökkan brauðhleif á bretti og hníf og smjör. Síðan rækjukokteill borinn fram í sultukrukku. Ég fékk síðan sprødt svinebryst fra Grambogaard og Þórarinn Hjemmelavet oksepølse.
Við kusum að fá okkur eftirrétt á þeim stað sem Anna Margrét hafði mælt með góðu írsku kaffi. Það var á Grábræðratorgi 15 í Jensens Bøfhus. Ekki vorum við svikin þar en rörið var röndótt!!

Miðvikudagur 18. febrúar.

Helgi vakti okkur með upphringingu og stakk upp á að hittast á Restaurant Kronborg Brolæggerstræde 12. Þar hittumst við kl 12 fengum okkur dansk smörrebröd öl og snafs.

Gengum svo með honum Köbmagergade þar sem hann var á leið til tannlæknisins.

Litum við hjá Söstrene og keyptum smáhluti og hannyrðabúðin Sommerfuglen var yfirfarin á meðan Þórarinn brá sér á krána á móti. Þar hefði ég getað verið miklu lengur að spá og spekulera. Á heimleiðinni litum við inn á bar á annarri hæð hússins þar sem Long John Silver átti að vera en hann hét eitthvað allt annað og hvergi nein merki um Silfraða langa-Jón. Síðan röltum við heim.

Fimmtudagur 19. febrúar

Þennan morgun vöknuðum við klukkan 7 til að þrífa og pakka. Fórum svo með línu 20 á Brautarstöðina og í lestinni á Kastrup.

Tékkuðum okkur inn 3 klst fyrir brottför – dóluðum í fríhöfninni – og keypum mat í Fine Food. Á heimleiðinni komst ég lítið áfram í bókinni (Menn sem hata konur eftir Stieg Larsen) sem ég hef verið að lesa vegna syfju og hef heldur ekki komist mikið áfram í henni í ferðinni. Heim komumst við heilu og höldnu og bíllinn beið nýþveginn og bónaður á flugstöðinni.

Þorrablót 2009

Föstudagur 23. janúar

Hið árlega þorrablót var haldið hjá Kristínu Mjöll á bóndadegi þann 23. janúar í ár. Á borðum voru miklar kræsingar. Hákarl og hrútspungar, súr hvalur, harðfiskur og sulta og ýmislegt annað sem sjá má. Allir kátir og hressir enginn með flensu.

Húsfreyjan í eldhúsinu

Raggý og Gústi

Sigfús og Margrét

Anna og Þórarinn

Kristín með brennivínstár

Rannveig - Þórarinn - Anna - Sigfús - Margrét - Gústi - Raggý

Afmæli Hilmis

Hilmir varð 9 ára þann 20 janúar. Veislan var á Tómasarhaga sunnudaginn 24. janúar.

Snjór 20 desember 2008

Það voru rauð jól þetta árið og meira að segja 2ja stafa tala á hitamælum um tíma. Þann 20. desember náðust þessar myndir en snjórinn stóð stutt við aðeins í einn eða tvo daga.

Inga í nýrri vinnu.

Inga er komin í tímabundið starf fram á haust. Því miður verður hún að fresta námi sínu í HÍ um sinn. Hún vinnur hjá nýstofnaðri rannsóknarnefnd Alþingis á hruni bankakerfisins. Í dag 9. janúar var haldinn blaðamannafundur og störf nefndarinnar kynnt.

Afi langi og Grund

Hjúkrunarheimilið Grund.
Afi hefur í nokkurn tíma látið í ljós þá ósk sína að komast á hjúkrunarheimili. Hann hefur undanfarið nokkuð oft þurft að leita læknis og verið ónógur sjálfum sér og að mestu legið í körinni eins og hann segir sjálfur. 5. janúar var hringt frá Grund og honum boðið pláss sem hafði losnað á hjúkrunardeild herbergi 332 á 3. hæð. Hann verður í byrjun a.m.k. í tvíbýli. Við Þórarinn fórum og skoðuðum aðstæður fyrst og síðan afi sjálfur með okkur Eyrúnu og Steinunni. Honum og okkur öllum leist vel á allan aðbúnað og þjónustuna sem í boði er. Hjúkrunarkonan sagði að aðlögun tæki yfirleitt 3 mánuði og vonum við að hún gangi vel.

Skoðið heimasíðu Grundar http://www.grund.is/

Auja og Fúsi í kvöldmat.

4. janúar komu Auja og Fúsi í kvöldmat til okkar en við höfum oftast hist í kringum áramótin. Alltaf er jafngott að eiga með þeim samverustundir og hefur vinátta okkar varað síðan snemma árs 1968 þegar við vorum í tilhugalífinu og unnum öll hjá Sjónvarpinu. Á fyrstu árum sjónvarpsins, sem hóf útsendingar 30. september 1966, var oft glatt á hjalla hjá starfsfólkinu og urðu þarna til nokkur hjónabönd. Ég man eftir Auju og Fúsa – Simma og Ásthildi – Ásu Finns. og Jóa Long – Rögnu Fossberg og Helga Sveinbjörnss. – auk okkar Þórarins. Á 3ja ára fresti hafa verið haldin svart-hvít böll eins og við köllum þau. Þórarinn er líka í “saumklúbb” með nokkrum gömlum starfsfélögum. Þeir halda árlega þorrablót og fara í sumarbústað.

Eyjólfsboð

Eyjólfur bauð sonum sínum Þóri, Guðna, Þórarni og fjölskyldum út að borða í kringum áramótin síðustu árin sem hann lifði. Eftir lát hans héldum við þeim sið að hittast á þessum tíma. Við höfum hist í heimahúsum og í þetta sinn hjá Ernu Þórisdóttur og Magnúsi Eyjólfssyni. Við komum aðeins 5 úr minni stóru fjölskyldu vegna fjarlægðar, vinnu, próflestrar, bridgemóts og barneigna. Erna og Maggi búa í stóru húsi í nýju hverfi og þurftum við að leggjast yfir kortið til að finna staðinn sem er í Kópavogi og heitir Goðakór 2. Ekki bætti niðdimm þokan leitarsvæðið. Í bígerð er að fara eina helgi í júlí í Steig í Mýrdal þar sem Þórir og Þórarinn voru í sveit hjá Stígi í Steig (sem stökk út og meig eins og Þrándur Thoroddsen sagði alltaf). Stígur var bróðir Eyjólfs. Í Steig rekur Ólafur Stígsson gistiheimili með mörgum herbergjum svo það ætti ekki að væsa um okkur.

Nýársdagur 2009

1. janúar Gleðilegt nýtt ár!!
Beðið hafði verið eftir barni Aðalheiðar og Eymundar í nokkurn tíma og mikill spenna í lofti hvoru megin áramótanna það myndi fæðast og eins hvort það yrði stelpa eða strákur. Mikil gleði var þegar fæðingin var yfirstaðin klukkan 15:56 á sjálfan nýjársdag og rúmlega 18 marka stúlka(nánar tiltekið 4620 g) komin í heiminn og móður og barni heilsaðist vel.

Bréfið frá fjölskyldunni

Hæ hæ, Meðfylgjandi eru myndir af nýársundrinu okkar. 18,5 marka stelpa fædd kl. 15:56 á nýársdag. Lét okkur aldeilis bíða eftir sér eða í tæpar tvær vikur. Snjöll stelpa.... naut góðs af öllum veitingunum og dafnaði eftir því á meðan.

Bestu kveðjur Aðalheiður, Baddi, Arnhildur og litlan

Áramótagleði

31. Áramótagleði fjölskyldna bræðranna frá Busthúsum Þórarins og Tómasar var að þessu sinni haldin hér heima. Mættir voru 25 manns. Boðið var upp á kalt veisluborð og drykki eftir óskum hvers og eins. Að venju var Þórarinn aðalkokkurinn. Vignir sá um uppákomur eins og honum einum er lagið. Allir mættu með höfuðföt og verðlaun voru veitt fyrir frumlegasta hattinn og eins fyrir réttustu lausn á fréttagetraun sem komið hafði verið fyrir í stigaganginum. Vignir hafði ljósritað forsíður gamalla dagblaða og við áttum að skrá rétt ártal á getraunaseðla. Önnur léttari samskonar gáta var fyrir börnin. Einar vann fréttagetraunina, Hreiðar Ingi barnagetraunina og Tómas fékk hattaverðlaunin. Horft var á skaupið og síðan var farið út og skotið og skotið og skálað í kampavíni á miðnætti.

Hjá Önnu Margréti og Guðna

Það var kærkomin tilbreyting að fara í jólaboð utan heimilis. Við áttum ánægjulegt kvöld í boði Önnu Margrétar og Guðna í Víðihlíðinni. Þar voru einnig Björk og Brandur og veitingar ekki af verri endanum.

Anna Sólrún 5 ára.

Anna Sólrún er hér stolt með litla bróður sinn.


Sjá myndir úr afmælinu .............

Aðfangadagskvöld og jóladagur

Á aðfangadagskvöld voru Inga, Hreiðar og Hilmir voru hjá okkur og það bjargaði jólastemmningunni að hafa ungviði á þessu kvöldi. Boðið var upp á hamborgarhrygg og hnetusteik. Möndlugrautur í eftirrétt að venju og Hreiðar hreppti möndluna og fékk handmálaða glerkúlu í verðlaun.

Fjölskylduveisla var í Byggðarenda á jóladag. Hangikjöt hnetusteik. Ís í eftirrétt. Félagsvist spiluð á 3 borðum. Afi sat á sama borði en við hin færðumst til. Margrét vann og skammarverðlaun fékk Eyrún (reyndar hafði gleymst að kaupa verðlaun)

Þorláksmessa

Á Þorláksmessu var okkur boðið í vel kæsta skötu a la Brandur með spilaklúbbssystum og mökum hjá Björk og Brandi. Þetta er bráðskemmtilegur siður sem allir hlakka til og vonandi verður ekki bannað að elda skötu (og salfisk) í fjölbýlishúsum um næstu jól. Einnig vonumst við til að mega taka þátt þá. Nýja, stóra borðstofuborðið kemur að góðum notum.

Rúbínbrúðkaup

40 ára brúðkaupsafmæli.
Þann 21. desember 1968 vorum við gefin saman í hjónaband í Þjóðkirkjunni í Hafnarfirði. Veislan var í Bólstaðarhlíð 27 eftir brúðkaupið en síðan buðu foreldrar mínir okkur nýgiftu hjónunum, Ingu tengdamömmu, Sigrúnu og Eyjólfi og Tómasi og Jonnu í kvöldmat á Hótel Holti. Finna ömmusystir mín passaði Eyrúnu heima, sem þá var 22 mánaða gömul. Síðan hefur mikið vatn runnið til sjávar. Við byrjuðum búskap í Skeiðarvogi 79 en fluttum síðan í Álfaskeið í Hafnarfirði þar sem Inga fæddist ´69 og síðan í Byggðarenda á meðan byggingarframkvæmdir stóðu yfir í 3 ár í Mosfellsbæ. Í Byggðarenda fæddust bæði Finnur´74 og Baddi´76. Næstu 30 árin bjuggum við svo í Álmholti og þar fæddist Steinunn, örverpið okkar 1984. Þegar við svo fluttum aftur í Byggðarenda í janúar 2008 voru allir fuglarnir okkar flognir úr hreiðrinu og við búum á efri hæðinni en afi langi flutti niður að eigin ósk.
Það hreint ótrúlegt að það séu liðin 40 ár og enn höldum við saman í gegnum súrt og sætt en þó aðallega sætt.
Við höfum átt barna-og barnabarnaláni að fagna og það gefur okkur ómetanlega ánægju að sjá þau vaxa og þroskast. Við höfum farið ófáar ferðir til útlanda og innanlands líka ýmist með börnunum eða vinum eða bara við tvö saman. Á hverju sumri frá 1982 höfum við notið þess að vera í sumarbústaðnum og frá 2002 líka í Hruna í Ólafsvík. Það sem veitir okkur þó mesta ánægju er að sjá hvað börnunum kemur vel saman og hvað þau spjara sig vel í lífsbaráttunni.

Jólaball í skóla

Helgileikur - nemendur í 4. bekk RS


Jólaball í skólanum 19. desember Hilmir kom með mér þar sem Hreiðar var að vinna og Inga í prófi. Hann vildi þó ekki dansa í kringum jólatréð með krökkunum og fékk að fara í tölvuna í stofunni minni á meðan. Eftir hádegi fór hann á jólaball í Melaskólanum. Eftir jólaballið var ég komin í kærkomið jólafrí. Í ár voru ekki atvinnurekendajól og það voru margir frídagar hjá “vinnandi” fólki. Ég fæ samtals 16 frídaga þessi jól. Þeir verða samt sjálfsagt allt of fljótir að líða og erfitt að snúa sólarhringnum aftur við í janúar.

Rauður dagur

Ragna með nemendum sínum í 2. bekk

Bryndís með sínum nemendum

Fremst til vinstri er sonardóttir Kristínar Sigsteinsd.

Það var rauður dagur í skólanum í dag. Allir sem geta og muna mæta í rauðum fötum.

Kennarar og nemendur borðuðu saman í matsalnum. Á borðum var hangikjöt með öllu tilheyrandi.

Jólahóf Kvikmyndasafns

Þórarinn býður gesti velkomna

Servíettuhringurinn var rauður filmukjarni
Boðið var upp á hangikjöt og laufabrauð sem smakkaðist frábærlega.